Unglingameistarmót Íslands í Hlíðarfjalli 2024

Unglingameistarmót Íslands í alpagreinum 2024 fór fram í Hlíðarfjalli síðastliðna helgi 11.-14. apríl.

Mótið var sett við hátíðlega athöfn í Akureyrararkirkju á fimmtudaginn og keppt var föstudag til sunnudags. 

Keppt var í svigi á föstudeginum við mjög krefjandi aðstæður en dagurinn varð langur og starfsfólk mótsins fékk að moka ansi mikinn snjó úr brautunum. 

Betri aðstæður voru á laugardeginum þegar keppt var í stórsvigi. Færið hélt þá vel og sólin lét sjá sig eftir hádegi en keppt var í 12-13 ára flokki í Norðurbakka og 14-15 ára í Suðurbakka samtímis. Að móti loknu var glæsileg verðlaunaafhending í Naustaskóla en þar voru verðlaun veitt fyrir mótið, fjölmörg útdráttarverðlaun frá styrktaraðilum mótsins og SKÍ veitti bikarmeistaratitla.

Meðal keppenda SKA í 12-13 ára flokki var Friðrik Kjartan Sölvason Unglingameistari í samhliðasvigi, 2. sæti í svigi, stórsvigi, alpatvíkeppni og á bikarstigum, Sylvía Mörk Kristinsdóttir varð Unglingameistari í stórsvigi og bikarmeistari SKÍ. Í 14-15 ára flokki náði Sindri Már Jónsson 3. sæti í samhliðasvigi og Frosti Orrason var í 3. sæti í stórsvigi. SKA óskar þeim innilega til hamingju með árangurinn.

Á sunnudeginum var keppt í samhliðasvigi í Norðurbakka og mótinu lokað með stæl en glampandi sól og frábærar aðstæður einkenndu daginn.

Öll úrslit má nálgast í mótakerfi SKÍ hér. 

Skíðafélag Akureyrar þakkar öllum keppendum, aðstandendum, starfsfólki og styrktaraðilum kærlega fyrir frábært mót og óskum öllum verðlaunahöfum til hamingju.